Ներեցե՛ք, պա՛ն Վիշնևսկի…. :)

Լիանա Վանեսյան

(իմ գրպանների մտքերը...)

Արդեն կես տարի է` ես ինձ արդարացիորեն համարում եմ լեհ գրող Յանուշ Լեոն Վիշնևսկու երկրպագուն, նրա գրքերի մեծ սիրահարը:

Երևանյան գրադարաններում, սակայն, նրա մասին քչերը գիտեն: Աշխատակցուհիներից մեկն էլ ինձ նախատեց «ընկել եք գերժամանակակից դատարկագլուխների վեպեր եք կարդում….Մոպասանի  «Կյանքը» կարդա, աղջի՛կ….Այսպես գրադարանից գիրքը վերցնել-կարդալու տարբերակը սպառեց իրեն…

Հետո գրախանութ…3800 դրամ….չէ, ես գրքասեր եմ….բայց գրքասեր ժլատ…J

Ի վերջո…հեռախոսիս մեջ բեռնել եմ Վիշնևսկու 12 գիրք…7-ն արդեն կարդացել եմ (այս տարբերակը թվածներիցս ամենավատն է` արդյունքում ինձ ասացին ակնաբուժները):

Ու երեկ առավոտյան իմացա, որ Վիշնևսկին Երևանում է և հանդիպելու է ընթերցողներին: Նրա ամենահայտնի գործերից է «Մենությունը ցանցում» գիրքը, որը համացանցի միջոցով ծանոթացած, սիրահարված, բայց ի վերջո իրականություն վերադարձած կնոջ և տղամարդու պատմություն է: Շատերն այն ամփոփում են հեղինակի կողմից արված մեկ արտահայտության մեջ` հավերժական երևույթներից ամենակարճատևը սերն է: Գիրքը գրվել է հեղինակի համար շատ բարդ ժամանակահատվածում: «Ես բաժանվել էի կնոջիցս, ծանր հոգեվիճակում էի, ու հասկացա, որ այսպիսի գիրք գրելն ավելի էժան կլինի, քան հոգեբանին դիմելը»:  

Գիտնական, տեսաբան, քիմիկ, գրող և իսկական ռոմանտիկ այս հեղինակը երկու ժամում գրավեց ներկա բոլոր կանանց սրտերը: «Աստղերին կարելի է նայել որպես աստղագետ և որպես պոետ…ես այդպես նայում եմ կնոջը»,-ասում է Վիշնևսկին:

Գրողը հաճախ է իր վեպերում խոսում Հիտլերի մասին: Հավաքվածներին հետաքրքիր էր, որն է դրա դրդապատճառը…«Մայրս գերմանուհի էր, ծնված Հիտլերի ծննդյան օրը, հայրս 8 տարի անց էր կացրել համակենտրոնացման ճամբարում…Չգիտեմ ճակատագիր է, թե ինչ….Գրողի համար սա արդեն պատրաստ գիրք է»:  

Վիշնևսկին  հիացած էր հայ կանանց և աղջիկների գեղեցկությամբ: Հատկապես, որ բացի այդ նրանք կարդում են…

Հանդիպման ավարտին մոտ, սակայն, ոգևորությունս և դեմքիս ժպիտը վերացան, երբ գրողն ասաց, որ արդար չէ անվճար «ձախ» կայքերից բեռնել գրքեր, որոնց գրելիս գրողն իր զգացմունքներն ու մտավոր ջանքերն է ներդրել…ավելի արդար է գնել գիրքն ու կարդալ…Ես դանդա˜ղ, թաթերի վրա հեռացա սրահից…J

Ներեցե՛ք, պա՛ն Վիշնևսկի….:)